Akka qajeelfama haaraa bahe kanaatti baankiilee birkiitti hawaasa naannoo baankiilee sanaa jiraatu irraa kan hafe daldaltoonni maallaqa callaadhaan galchuu fi baasuu akka hin dandeenye taasisamee jira. Akka bulchaan Baankii Biyaalessaa Itiyoophiyaa, Dr. Yinnaager Dasee Sagalee Ameerikaatti himanitti, qajeelfamni akkanaa bahuun adda addummaa gatii sharafa alaa gabaawwan seeraa alaa fi baankiilee gidduutti bal’atee jiru dhiphisuutti akeekkamee ti.
Naannoo Somaalee keessatti kan argamtu magaalaan daangaa irraa Toogoocaaleen magaalaalee gabaa sharafa maallaqaa seeraa alaa yokaan “Black Market” jedhamuun beekaman keessaa tokko tahuu ka dubbatan – Dr. Yinnaageer, magaalaalee daangaa irraa kanneen akka Matammaa fi Duptii keessattis qajeelfamichi haaraan kan hojii irra oolfamu tahuu hubachiisanii jrian.
