Prezidaantiin Tuuniisiyaa Kaayis Saayid godaantota biyyootii uffee Sahaaraa gad jiran irratti duula biyyaa ari’amuu, qe’ee irraa buqqa’uu fi haleellaa erga jalqabanii booda loogii sanyii oofuu jechuun komee irratti dhiyaate haalanii jiran.
Baatii darbe Saayid, angawoonni biyyattii koolu-galtummaa seraan alaa hambisuuf jecha tarkaanfii hatattamaa akka fudhatan ajajanii turan. Ragaa utuu hin dhiyeessin akkaataa baay’ina uummata Tuuniisiyaa jijjiiraa jira jechuu dhaan hojiin yaddaa hojjetamaa jira jechuun himatan.
Koolu galtoonni yakka biyyootii Afriikaa kaabaa irra jireessa keessatti hojjetamuuf itti gaafatamu jechuun illee himatanii jiran.
Koolu galtoonni dhibbaan laka’aman, erga prezidaantichi kana dubbatanii booda hookkara ka’uu mala jedhame jedhaa dheessuun Tuniisiyaa gad dhiisanii ba’uun biyya ofiitti deebi’anii jiran.
Gamtaan Afriikaa kana dura yaada Saayid kennan ilaalchisuu dhaan yaaddoo cimaa qabu ibsee, biyyoonni miseensota ta’an haasaa jibbiinsa sanyummaa irraa akka of qusatan gaafateera..
Lakkoofsi sirnaa akka agarsiisutti, , godaantotni waraqaa ragaa hin qabne kutaalee Afrikaa biroo irraa gara kuma 21 ta’an Tuniisiyaa keessa kan jiran yoo ta’u, biyyattiin uummata miliyoona 12 ta’antu keessa jiraata.
Forum