Poolisiin Paaris guyyaa Roobii kaleessaa namoota godaantoota ta’an kanneen maatii fi daa’imman xixiqqoo qaban dabalatee kanneen moraa galma magaalaa Paaris fuuladura jiraatan bakkaa buqqisteetti, Kunis magaalittiin tapha Oloompikii gaggeessuuf guyyaan 100 yommuu hafuttidha.
Poolisiin magaalittii yommuu dhufetti godaantoota baay’inni isaanii 50 ta’an kanneen roobaa fi qorraaf jecha da’annoo pilaastikootarraa ijaarrataniiran diiguun buqqiseera. Namoota buqqa’an kanneen keessatti dubartoonni fi daa’imman umrii 3 hanga 10 ta’an keesstti argamu. Yeroo buqqifaman kanattis Godaantoonni meeshaalee isaanii Awutoobisiitti fe’uun buufata mootummaan yeroof qopheesseef kan Magaalaa Besaankon baha Faraansaayiitti argamutti geeffamaniiru.
Hojjettoonni gargaarsaa gama isaaniin tarkaanfiin Roobii kaleessaa godaantoota irratti fudhatame kun filannoo mana jireenyaa yeroo dheeraa osoo hin kenniiniif godaantotaa fi namoota biroo kaan isaanii osoo rafaa jiraanii fi osoo hin beeksisiin tapha Oloompikii dura magaalaa guddoo biyyattii keessaa qulqulleessuuf tarkaanfii angawoonni Paaris fudhatanirratti yaaddoo akka qabn dubbatu.
Qindeessitoonni dorgommii Oloompikiimmoo gareewwan gargaarsaa waliin ta’uun furmaata barbaaduu irratti akka hojjetan himaniiru.
Godaantoota kanneen keessattis baay’inaan kanneen afaan Fireenchii dubbatan lammilee biyyoota Afrikaa Burkinafaasoo, Giinii, Ayiivooriikostii fi Seneegaal akka ta’anis gabaafameera.
Forum