WAASHINGITAN, DIISII —
Prezidaantiin Yunaayitid Isteetis – Doonaald Traamp, filannoo walakkeessa marsaa, ka kaleessa guutummaa biyyattii keessatti geggeessame irratti “injifannoo guddaa arganne” jechuun dhaadhessanii dubbatan.
Filannoo sana irratti, paartiin dimookiraatotaa mana-maree bakka-bu’ootaa keessatti sagalee yayyabaa argatan iyyuu, Rippuubilikaanonni mana-maree murtii seeraa keessatti akkuma sagalee irra-jireessa qabatanitti hafan.
Filannoon ammaa kun, baatii Amajjiitti, mana-maree siyaasaan addaan-qoodame waltajjiitti fiduuf, prezidaant Traamp, imaammatoota isaanii raggaasisiifachuuf rakkoon mudachuuf deema – jedhama.