Yunaayitid Isteetis Gargaarsa Nyaataa Yeroof Itiyoophiyaa Irraa Dhaabuu Beeksiste 

Midhaan nyaataa bifa gargaarsaan gara Itiyoophiyaatti ergamu warra ergameefin bira dhaqqabuu dhiisee dhimmoota biroof oolaa jira jechuunDhaabbanni misooma Idil- Addunyaa kan Yuunaayitiid Isteetis (USAID) midhaan nyaataa gargaarsaan gara Itiyoophiyaatti ergu dhaabuu isaa beeksiise. Dubbii himaan dhaabbatichaa kamisa har’aa ibsa Naayiroobii Keeniyaatti baasaniin dhaabbanni isaanii Mootummaa Itiyoophiyaa waliin akka irratti walii galanii fi midhaan nyaataa gargarsaa garasitti ergamu kaayyoo ergameefiin alattis ooleera jedhan.

Yuunaayiitid Isteetsi biyya gargaarsa namoomaa guddaa Itiyoophiyaaf kennitu ta’uu kan eere ibsichi namoonni miiliyoona 20 ol ta’an sababoota goginsaa fi wal waraansa kaaba biyyattii keessa tureen gargaarsa midhaan nyaataa akka barbaadanis himeera.

Gargaarsi midhaan nyaataa kun gara Itiyoophiyaatti ergamuu kan dhaabbateef humnoonni waraanaa nyaataaf oolfachuu isaaf akka ta’e Reyooreesi odeeffachuu isaa gabaaseera. Gama Mootummaa Itiyoophiyaarraas ta’e kan humna waraanaarraa dhimma kanarratti hanga ammaatti waanti jedhame hin jiru.

Dubbii himaan dhaabbata misooma Idil- Addunyaa kan Yuunaayitiid Isteetis hojimaata haala gargaarsi biyyattii keessatti raabsamu irratti amantaa akkuma arganneen deebisnee gargaarsa midhaan nyaataa erguu ni eegalla jedhan.

Haaluma wal fakkaatuun dhaabbata Mootummoota Gamtoomaniitti Sagantaan nyaata Addunyaa ji’a darberraa kaasee midhaan gargaarsaa gara Itiyoophiyaatti ergu dhaabuu beeksiisuun isaa ni yaadatama.