Ajjeechaa fi uummanni qe’ee irraa buqa’uu mormuu dhaaf kaleessa magaalaa Naqamtee keessatti hiriirri geggeeffamuu isaa sagantaa keenya kaleessaa irratti gabaasuun ni yaadamta.
Hiriirri kun har’as itti fufee ibsa ejjennoo dhiyeessuu akkasumas kanneen du’an yaadachuuf sirni ibsa dungoo qabsiisuun xumuramuu bakka bu’oonni garee mormituu fi qaamni mootummaa nuuf ibsaniiru. Kanneen naannoo daangaa Beenishangulitti ajjeefaman keessaa sirni awwaalcha Shaambal Geetaachoo illee raawwatamuu nuuf ibsniiru. Bakka bu’aan KFO godina wallaggaa Bahaa obbo Fiqaaduu Ayyaanaa akka dubbatanitti ajjeechaan kun hamma nu irraa dhaabatutti waajjiraaleen mootummaa akka hin banamne dhaamsa dabarsinee jirra jedhan.
Komee uummati dhiyeeffatu kanaa fi hiriira har’a magaalaa Naqamtee keessatti geggeeffame irratti deebii gama mootummaa kan nuu kennan itti gaafatamaa bulchiinsaa fi nageenya Wallaggaa Bahaa obbo Taakkelee Tolosaa argannee jirra. Komeen uummataa kun dhugaa dha. Farreen nageenyaa uummatichi mootummaa waliin ta’uun saaxiluu qaba jedhanii, nageenyi bakkatti akka deebi’uuf irratti hojjetamaa jira jedhan.
Your browser doesn’t support HTML5
Ajjeechaan Nu Irraa Haa Dhaabatu Jechuun Magaalaa Naqamtee Keessatti Hiriirri Geggeeffamu Itti fufe