WASHINGTON, DC —
Koreen Hariiroo alaa, kan Mana-maree murtii seeraa Yunaayitid Isteets, kan prezidaant Donaald Traamp – ministarummaa Dhimma-alaa Yunaayitid Isteetsiif dhiheeffatan – abbaa-qabeenyaa daldala boba’aa – Reks Tilirten taayitaa sanaaf raggaasisuu fi dhiisuu irratti har’a sagalee kennuuf jira.
Rippuublikaantichi – Senaator Maarkoo Ruubiyoo akka deggeranii sagalee kennan waan mallattoo agarsiisaniif jecha, Tilirten ministarummaa dhimma alaaf raggaasisamuun isaa hin oolu – jedhama.
Tilirten Raashiyaa waliin hariiroo qabaachuu isaaniitti ka duraan yaaddoo isaanii ibsanii turan – Seneetar Joon Mikkeenii fi Seneetar Liinsii Grahaam, kaleessa ejjennoo isaanii murteeffachuun akka muudama Tilirten deggeran beeksisan.
