Muummicha-ministaraa Hayilemariyaam:Imaammatni Mootummaa Itiyoophiyaa Dhaabbataa Dha

WASHINGTON DC —  Kan as Niwu-yoorkitti kora walii-galaa ka Tokkummaa Mootummootaatti hirmaataa jiran - Muummichi-ministaraa Itiyoophiyaa haaraan - Hayilemariyaam Dessaalegni dhimma daangaa irratti, imaammatni Mootumman isaanii hariiroo Ertiraa waliiniif qabu akkasumas laga Abbayaatti fayyadamuu ilaalchisee imaammatni Masriif qabu dhaabbataa akka tahe eeruudhaan, Mootummaan isaanii karaa nagaa furmaata fiduutti ka cichu ta’uu dubbatan.

Ertiraa waliin, kaleessas, har’as wal-dhibdee qabnu karaa nagaa furachuuf waggoota sagaliif balbala bannee eegaa jirra, jedhu - Obbo Hayilemariam.

Mootummaan Masrii haaraan, tarii, Mootummaa keessan ammaa kana akka carraatti fudhachuun akka dhimmi Abbayatti fayyadamuu keessa deebi’amee dubbatamu yaaluu mala. Ejjennoon keessan maali? gaaffii jedhuuf ennaa deebisanis, dhimmi Abbayaa dhimma Itiyoophiyaa fi dhimma Masrii qofa miti. Dhimmi kunis dhimma haaraa miti - jedhanii, mirga biyya isaanii Abbayatti gargaaramuuf qabduu fi haala itti dantaan biyyoota biroo eegamu ibsanii jiran.