Magaalaa Haratitti har’a ganama irraa jalqabee ugguramee oole, jedha – gabaasaan VOA Addis Chekkol. Daldaltoonni ganama dhaabbatoota isaanii banan akka cufan dargaggootaan itti himamuu isaa fi kanneen cufuu didanitti dargaggoonni dhagaa darbachuu, daldaltoonni maqaan isaanii akka himamu hin feene itti himuu isaanis gabaasee jira.
Jiraattonni VOAf yaada isaanii kennan saaminsis tahe qabeenyaa gubuun akka hin turiin kan dubbatan yoo tahu, garuu karaa cufuuf jecha yeroo gommaaleen karaa irratti gubaman kanneen agarsiisan – suuraaleen midiyaalee hawaasaa irratti maxxansamaa turan.
Akka ragaalee VOA dhaqqabaniitti, dhaabbatoonni daldalaa, manneen hojii mootummaa fi baankonni magaalattii keessa jiran guutummaatti cufamanii oolan. Daandiileen gommaa fi meeshaalee adda addaatiin cufaman tokko tokko ennaa humnoota naga-eegumsaatiin banaman, daandiileen ka biroon immoo akka cufamaa turan – maddeen kun gabaasaa VOAf ibsanii jiran. Kana irratti gama mootummaa tii ibsa argachuuf jecha, waajira poolisii, Biiroo Haqaa fi Nageenyaa, akkasumas, aangawoota waajira dhimmooa Koomiyunikeeshinii naannoo Harariitti bilbilee akka itti hin milaaka’iin – gabaasaan VOA himee jira.
Sochiin uggura hojii fi cufanisa kanaa magaalaa Godinaa Harargee Bahaa, keessumaa, Qobboo fi Awwadaay keessa akka ture, maddeen VOAf ibsanii jiran. Sababaa kanaan, geejjibni biyyoolessaa sa’atiilee haga tokkoof danqamuu maddeen kun himanii jiran.
