Kongresiin Federaalawa Oromoo, Oromiyaa keessatti lakkoobsi namoota du’anii 86 ga’uu isaa, gabaasaalee godinaaleen Oromiyaa adda addaa irraa argate ka mirkaneessu ta’uu beeksisee jira. Itti-aanaa dura-ta’aan dhaabichaa, Obbo Mul’aatuu Gammachuu akka jedhanitti, lakkoobsi kun ka xumuraa miti. Maqaa bakkawwan namoonni itti ajjeesaman – jedhanii fi lakkoobsa namoota du’anii ka tarreessan – Obbo Mulaatuun, bakkawwan hafan irraa amma illee gabaasaa irraa eegaa jirra - jedhu.
Lakkoobsi namoota madaawanii, kan hidhaatti guuramanii fi achi-buuteen isaanii dhabamanii hedduu ta’us, haga ammaatti akka gabaasaa guutuu hin argatiin hubachiisan - Obbo Muaatuun.
Bakkawwan Obbo Mulaatuu Gammachuu armaa olitti maqaa dhawan keessaa – ka Sanbata dabre, namoonni hedduun keessatti ajjeesaman – jechuun jiraattonni dubbatan keessaa tokko, kan Harargee Bahaatti argamtu magaalaa Awadaay.
Himannaa jiraattotaa fi ibsa itti-aanaa dura-taa’aan Kongiresa Federaalawa Oromoo kana ilaachisuun, ka VOAf har’a deebii kennanWaajira Dhimmoota Koominikeeshinii Mootummaa, ka Federaala Iriyoophiyaatti, Itti-gaafatamaa Quunnamtii uummataa ka ta’an – Obbo Mohammed Said, waa’ee namoota ajjeesaman – jedhamanii, gabaasaaleen gama adda addaatiin haga ammaatti dhihaatan “oduu dharaa – farreen nageenyaatiin oofamu. Uummata walitti-buusuuf jecha, oduu dharaa oofaa turan tu amma illee itti fufe” – jedhan.
Waa’ee lakkoobsa namoota haga ammaa Oromiyaa keessattis tahe walumaa-galatti Itiyoophiyaa keessatti eega Sanbata dabree tii as ajjeesaman – jedhamees, oduun jaarmayaalee adda addaa fi miidiyaalee hawaasummaa irratti odeessaman – oduu ololaa fi dharaa ti – jechuudhaan, mootummaan isaanii – gabaasaa sirrii ta’e ka baasuuf jiruu ta’uu dubbatan – Obbo Mohaammed Sa’id.
Guutummaa qophii keenyaa dhaggeeffadhaa
